ဇွန်လ ၁၉ ရက်နေ့ထုတ် ကြေးမုံ သတင်းစာကို ဖတ်ရင်း အတွေးပေါက် မိတာလေးတွေ ပြန်ရေးချင်ပါတယ်။
ပထမဆုံး နိုင်ငံတကာ သတင်းများ ကဏ္ဍမှာပါတဲ့ “တစ်ကမ္ဘာလုံး လူဦးရေ၏ စုစုပေါင်း ကိုယ်အလေးချိန် သိပ္ပံပညာရှင်များ ခန့်မှန်း ကိုယ်အလေးချိန် လွန်ကဲသူများ သဘာဝပတ်ဝန်းကျင်ကို ခြိမ်းခြောက်နေ” ဆိုတဲ့ သတင်းမှာ မပြုံးဘဲ မနေနိုင် ဖြစ်သွားပါတယ်။
နောက်ဆို ဝတဲ့သူများကို သဘာဝပတ်ဝန်းကျင်ကို ခြိမ်းခြောက်နေသူများ ဆိုပြီး စလို့ ကောင်းသွားပြီလို့ အတွေးပေါက်မိလို့ပါ။ တစ်ဆက်တည်း တစ်ကမ္ဘာလုံး လူဦးရေရဲ့ စုစုပေါင်း ကိုယ်အလေးချိန်ကို တိုင်းတာကြတဲ့ သိပ္ပံပညာရှင်များရဲ့ အတွေးကိုလည်း အံ့သြမိသွားပါတယ်။ မိုက်သဟလို့ မှတ်ချက်ပြုမိပါတယ်။
နောက် သတင်းတစ်ပုဒ်ကတော့ အားကစား သတင်းပါ။ “မြန်မာ ယူ-၂၂ အသင်း အိမ်ရှင် ထိုင်းအသင်းကို သုံးဂိုး - တစ်ဂိုးဖြင့် နိုင်” တဲ့။ ထုံးစံအတိုင်း မြန်မာအသင်း နိုင်ရင်တော့ သတင်းစာမှာ ဖတ်ရမှာပါ ဆိုသလိုပါပဲ။
ဒါပေမဲ့ ဒါဟာ သာမန် ခြေစမ်းပွဲ အားမနာတမ်း ပြောရရင် ထိုင်းက ခေါ်ပြီး ဆိုက်ကို လုပ်တဲ့ပွဲလို့ ထင်ထားတာပါ။ ထင်တဲ့အတိုင်း နောက်ဆုံးရ သတင်းတွေအရ မော်လဒိုက်နဲ့ ကန်တဲ့ နောက်တစ်ပွဲမှာ မြန်မာအသင်းက တစ်ဂိုး ဂိုးမရှိနဲ့ ရှုံးပါသတဲ့။ အရန်အသင်းနဲ့ ကန်သွားတာလို့တော့ ပြောတာပဲ။ ထိုင်းနဲ့ပွဲတုန်းကရော ထိုင်းတွေ ဘယ်လို ပြောသလဲ သိချင်မိတယ်။ ဘာပဲပြောပြော မနက်ဖြန် သတင်းစာမှာတော့ ရှုံးတဲ့သတင်း ပါမယ် မထင်မိဘူး။
နောက်တစ်ပုဒ်က နောက်ဖုံးမှာပါတဲ့ “ဂီတ အစည်းအရုံးအဖွဲ့ဝင် တစ်ဦးချင်းအနေဖြင့် လွတ်လပ်စွာ ဆောင်ရွက်ခွင့်ရှိ၊ အဖွဲ့အစည်း အနေဖြင့်မူ နိုင်ငံရေးအရ အသုံးချခံ မဖြစ်ရအောင် ဂရုပြု” သတင်းပါ။
ပြန်ကြားရေး ဝန်ကြီးဌာနနှင့် ယဉ်ကျေးမှု ဝန်ကြီးဌာန ပြည်ထောင်စု ဝန်ကြီး ဦးကျော်ဆန်းရဲ့ အမှာစကားကနေ ကောက်နုတ် ခေါင်းတင်ထားတာပါ။
ပေါ်လစီကားတို့ ပေါ်လစီသီချင်းတို့ဆိုတာ ဘယ်သူတွေ လုပ်ခဲ့တာလည်း ပြန်တွေးမိပါရဲ့။
နောက်ဆုံးတစ်ပုဒ် အနေနဲ့ မျက်နှာဖုံးက “နိုင်ငံတော် သမ္မတ၏ မိန့်ခွန်းအား ပြည်သူများ အချိန်နှင့် တစ်ပြေးညီ သိရှိနိုင်စေရေး အတွက် ရုပ်မြင်သံကြားမှ တိုက်ရိုက်ထုတ်လွှင့်ပြီး သတင်းစာများတွင်လည်း အပြည့်အစုံ ဖော်ပြသွားမည်” ဆိုတဲ့ သတင်းကို မျက်စိကျပါတယ်။
ဟုတ်ပါတယ်။ အပြည့်အစုံလေးနဲ့ တကယ့်ကို အချိန်နဲ့ တစ်ပြေးညီလေး လုပ်သင့်ပါတယ်။ ဒါမှသာ နိုင်ငံတော် သမ္မတရုံး ဝဘ်ဆိုက်ကနေ သတင်း အတည်ပြုချက် ရယူနေရာတာကနေ ပြန်ကြားရေး ဝန်ကြီးဌာန ဆိုက်ကို ပိုအားထားလာနိုင်မှာပါ။ နောက်ပြီးတော့ ဆိုတဲ့အတိုင်း အပြည့်အစုံလေးပေါ့နော်။ ဥက္ကဋ္ဌကြီးကို ပညာပြ လိုက်သလိုတော့ မလုပ်ပါနဲ့။ ဒါက သမ္မတမင်း ခင်ဗျ။
ဤတွင် သတင်းများကို အတင်းတုတ်လို့ ပြီးပါပြီ။
(အော် မျက်နှာဖုံး သတင်းကို နောက်ဆုံးမှ ပြောတဲ့ ကိစ္စလား။ အကျင့်ပါနေပြီဗျ အဟဲ။)
Comments
Post a Comment